Mínom nom kumríksudung
Karsang Takar
Minom no gíyé émna lé:lo marbangé
Ngandung néyi-nésin ngankampé
Ngandung oiyo po:pírké alaglo:sin lakpuné.
Abu mibubí:sin gítinsudu:bong
Murong okum talé:lo
Ka:yumné aín bísín ré:mipé ila ka:tínsudu:bong,
Minom nok gí:ang lamtélo asi ambíném pidyé:pé
Migom ku:mír bíla: mimé ku:ri binyesin kumsuyepé
Odo ré:badlígyé:pé mibu abu-bí
"Do:nyi tadlangka
Po:lo tadlangka
Se:di-Me:lo tadlangka
Karsing-Kartangé tadlangka
Sídé ngoluk dolungéla: simoni dolungé
Po:ragém dodu:néké"
Nom gíríksuyépé dumdum luppi manla
Édé songko ayirdo bírtagné mímbírdok ko:jumém ka:la mé:nyok suma:péka.
Ékíma:mílo, Sísang asiné ko:jum ko:jémém ka:la
Ayang alangé oborla bitpéké po:borlo po:ro apongpé.
Tíngír gírla du:péké bangko:langkuma:nam ayang abunglo.
Sé Po:rag-sé, léko molubnam arígé
Sé Po:rag-sé, Ju:né minomém léko kumoné gí:dí sí:píé
Po:rag-sé, Mo:té:lokké minom ayangém gangkumsumoné.
Ngokké po:ragé
Nokké po:ragé
Nokké ngokké po:ragé..
Minom no líglang tajígém
Ju:né minom no:sin líglangku dérmi oyingém
Odok tayo:do líksédyepé
O:ri, mírsi, take: talabém
-Ayangé kípumsu:yépé kumsu:lo.
Silosin gumragé
Yamposin gumragé
Ngoluk po:ragé
Sa: aipé
Minom nom kumríksudu:bong.
