Anu mé:lodlok Anu Lékor
-Karsang Takar
Sé:íng ngokké dungkoé
Sé:íng ngokké dakkoé
Ngokké do:lungé.
Ngolu Mising Abotani:ké ommangé, leke lokké:bong adi:tokké gíyídanla ngolu ané ruyído léppír pírla punné appun kísapé pundung. Ngoluk misingé leke lokkébong a:íké dírbí:ém méyoksumang.Síyum síro méyok sa-dubong. Lupénammém síkkanla síkmílo ngo lupopa:yé pakbo gínamém. Lekelo ngoluk Misinglok opanné taniyé mírom íra:lo ma-murkong narnam légangé aíké ommangém pagbopé todoai. Su:pak ka:toném édémpiné ager ko:ridém mé:sa:du:bong, Émpige:l kapé iyén donam inam kama:la mirom agérém ato pito:pé pa:ma:la sísang opeyé amik mo:rumlo ager gerkapé gípénampé idung, Akke Aiman tani:yé amik ommangém amik okumlo kolígbidung édé:sin aima:né agomé.
Ngoluk Misingé, siyum si:rok adíso amik opínlok ao-ommang kídarém ka:yir iyirsula ainé ainé bélamdo gísa:dubong. Sekai daktor,Yari yarné, Nitom tomné ,odokké adné kísapé atsa:dubong .Émpige:la kapiyén éddíko ayyonla gíyeji odok pongkogí:lo aimang aima:né moyimangémsin anbeg kabegdung, lumílo pa:yépé druks tí:nam odokké atí atí.
Po:pé ngoluk Misingé, lodí pu:mulo pu:sa:míndungai. Írang íra:lo kerasin romla yummé adílo turdoai. Supag édémpíné ngasodém ka:pa:tokuma:bong. Siyum sí:ro dijitel adíé. Kapiyén éddíko lolad ni:tomém mo:yéji déryango:pé yakané mukka:lo yoga:míndung.
Ngolu a:né ruyí:lo du:né. Ngo éddíko dijitel adíso émmé dorkampé dordaggom aimang aima:né napínasod kori:do ainé agomésin ugmíndag. Kapéné ngolum pu:mi assé monbang buksur. mo:mang monbangpé umodag okang ara:lok mé:lod ilodépag. Mo:píséi aso: aso:pé dijitel atí atído unsa:dung émpige:la supaksin ngoluk Misingé monbané gomlam í:lo gomdung. Lamté ruyílo tas kelinam, Lamté ruyílo apong tí:nam ager kídaré ngolum lédu mo:kotsumodung.
Ngoluk opíné sémpé lédumokotsumílo amik opínlok pu:po jarkampé jarmínlama:yé. Éddílokké ngolu aíké turnam bélamé kasu-mosíamyéji odolo:pé ngolu yoga:la gía:yé .
Ngoluk Misingé amik opínké punkampé punpé mé:mílo ngoluké mé:lodém anupé lékorém korpa:yé. Ékíma:mílo éddíkoi do:lung do:lu:lo karent, poka lamté a:daggom ngolu sungkenlok ta:parémpé ila dutíyé. Dok légangé ngolu anu mé:lodlo agerém gerpa:yé,
Do:lu do:lu:lo gíla ané abuém lukan bipa:yé siyum sí:ro apongém tí:mílo kapé ídang.
Ngoluk Sí:sa:né bíro-bírmangém pogo:lo gímonam atí atíko dokké mo:té mo:rumlo pagbo kolígnammé imanam agerém gerroppa:yé.
Odokké, Ngolu kapila pogo:lopé gípé lagidagji appíng do:yíngém régamém kinmonam kébangém ba:pé lagidag.
Sí:sang porin kébang kísapé appíng do:lu:lo gíla kébang ba:nam kosin imílo aido.
Ngoluk Mising opínsém aré kané appunpé punmopé mé:mílo, mé:namsém scitifically mé:pé ipa:yé odopag pu:po jarsa:yé. Ngolu mé:pa:yé anu lékorém ékíma:mílo ngolum amik opíné amik takotpésin mé:ma:yé. Ngolu togapsupa:yé a:péné longélok ngoluk sísané bíro-bírmangké légangé.
