Mising Agomlok Ngasodé la: Si:sang Ope:lok Gerpénam
Karsang Takar
Lupodannai, Oko opínlokké agomé yogyeji édé opínlokké kankínsunané arré kamang. Ngoluk mising agomdé luposunanéomang-Mising agomdé mising opínké légangé ngatur-ésaré. Mising agomdé édílo:pé turla du:píyen dokké ro: yampopé ngatur ésarpé sarla du:yelang ? Édé agomdém aipé mé:pénammé. Scheme for Protection and Preservation of Endangered Language a survey ila kinto Bharot among ara:so língko kolang yi:la:nítkopé agomé sinam lamtélo dung odo arangído North East Bharotsokké yi:pi:langumkopé agomé ko:ri rí:témínla dung. Lukap gímílosin asom mímongsokké Fokiyalélang Jakhari agomé a:té:míndung. Ngolusin sémípé lo:dísém mising agomsém mépagla gímílo ngoluk agomsé:sin siyepé.
Okomiya:pé kinji:ni pinnyo burné taniyé lutung - Siyum si:rok ommangé yampok mo:rumsokké dorbopéné takaré. Ngolu oko ageréméi geryé:ji pola du:do adídokkébong gerbompa:yé. Su:pak adíso lekelokkém matsík kokki pamín supatokumabong. Su:pak sé ayirsé pen-kokki pamínsupéna:mé. Asom ara:so Britishé ka:si:n migompé odokké asomso bangla agomém office atí atílo lígla asomsok du:né asomiya tani ara:lo ímé dorkampé dorla dungai. Édé adí asutlo Anandaram Dekiyal Phukan kémpiné mé:jubné taniyé lenla:pak lékoda 1873 dítaglo asomiya agomém turmokaku. Po:pé Britishé ka:sinépé du:doném asomiya taniyé asomiya agomdokké légangé atí atí lusar lukap gímílo “Orunodoi” kírído asomiya agomém turmonam légangé atí atíém atkang.
Édímí:pé ngolusin si:sané opeyé iskul kolejlo medium kísapé pa:mangom ngoluk oné anéké agomdém mé:tidla du:pé lagimang. 2024 dítaglo lenné mising ya:ri film "Miro"do kapé Karsangbulu mising agomké légangé gí:kají édímí:pé gímanggom aíké aíké do:lu:lo mising agomsém kinmonam légangé pokainam agerémsin gerla:dag.
Ngoluk Sí:sané Opeyé Mising Agomsém Ngetkudla:nam dok atí atí
É siyum síro ngoluk sí:sané opeyé mising agomsém ngetkutsula:du:dag. Odok légangé bojeko lugéngé dung lukapé gímílo pa:dag sémpé-
Siyum sí:ro modernisation ayiré inglish élang hindi lukinmílo aíémmangom amík lédulo dakkansula:dak "Smart"émna.
Siyum sí:rok adísé migom ager légangé ankangmínsudopé inglish élang hindiémpag to:sudak, odokké appí ankanglo english élang hindiépak mediumpé gía:dag émkunammé édémpiné lugéngkokki ngoluk mising agomsésin aipé nasodko ka:pa:dung.
Mising agomsé nappanglok lunam kokki aipé miromdaggom adgénglo aipé opandag. Po:péké dítaglo lí:nyi iskulo Mising agomsém pokaidopé ru:daggom iskuldo pokainé ka:ma:lasin nasotko ka:pa:dung.
Internate dokké social madia-do Do:nyi oang ara:lokké dírbí ésaré sarludla ngoluk mising agomké léppírésin bínsodmíndung.
Réngam ara:lo anu anupé kinné lusuné lendung inglish élang hindi-ém ambug bukkampé buggdag. Réngam ara:lo sé:koi édé agomkídardém lujodagji bí:éi régamlo kinné émnasin aimané ésar sarnamko ka:pa:dung. Odokké sé:koi mising agomsém pa:rí ri:la lu:kabojí édé ya:me mí:mbírdém “Monbang” émnam lunamkosin ka:yigdag.
Si:yum sí:ro Okum akkelo ané abudé mising Agom luma:pé ao-ommang lédulo inglish-élang Osomiapé:pag lu:posudag.
Mising agomdok légangé Sí:sang Poné opeké Gérgurpénam.
Mising Agomsé Asin agom do:ying luposunanéomang, Sé mising agomsé aíké opíném kangkin sunané émna ngolu kinsupa:yé.
Siyum si:rok ayir kídísé digital Ju:gé émkunammé ngolu mé:mi mílosin ngoluk ayyané mising agomsém social madia lumílo facebook, instragram, youtube atí atílo agomsém aí kísapé pídlígla gejigné agomsém punsamoldag.
Ngolu mé:mílo mising agomsém potino:pé adla mangom ointom, anunitom kísapésin gomug alamém jé:líg agomsém turyarmodopé tarungko ru:ladag.Iskul-College-Universitylo poné opeyé kébangko ba:manggomsin lo:níd longé ara:lo -mising agom luyir-poyirsunamko ila:dag. Odokké do:lu do:lulo tution ikampé Ajjou ajjouné kokangém pokainam agerkosin iladag.
Ngolu sí:sané opeye, Migomé okkoi luyeji, Migommangom TMPK, Mising Agom Kébangé lumanggom ngolu Asin dígla inamko ka:pa:yé ékíma:mílo ro-yampopé ngolu kangkin agomsém mosí:sulangkumayé. Ngolu Okum éddíko Ajjou ajjouné ko:kangé ísíng jarkampé jarsa:dují bulumsin english, osomiya, hindil ukaige:lasin aíké mising agomsém turgodbodopé ajjoudokkébong ngolu jígyír pa:yé.
Ngolu méngabpa:yé-Agomé kama:mílo,Opíné kama:yé,Opíné kama:mílo Ngok kangkiné kama:yé…
