Dokpun-ké Appun Amíng
Karsang Takar
Do:nyi oangkolo Bugrung do:lu:do aipé ligang longélo bojarém modag, mo:dilokké taniyé gíkumsula. Émpíla bojarém anbegla lo disém anédokké lédulo giminla ising-appun amíngém rédo odokké ledag okum lottalo. Okum lottalo su pakpé Ogog, Daliyang, Dendenang, Togor appuném léla métung, aipé appun kídardė pundung punjerra. Appun kéra do létung heuwali appuném. Heuwali appundé Disang Po:loso aipé aikala pundung yumdéng ayir a: yémilo aipé ari nampola du:dag odokké rokom yémiloi Dokpun-bi lang Unjer-bi heuwali kéglo heuwali appundém soliya:lo tikumla namsing lédudo kénggel doge:la iskul-pé gidag. Dokpun buluk ape: appi:lokké pojo:ya:né konéngé. Appun aming émna lumilo simad ma:ddag. Bojar gipi:dannai appun kokolo gila amíg bérgo la ka:toném pa:to gulab Appundém.
 |
Dokpun-ké Appun Amíng |
Anédé murkong kamang émna rébili:mangai émpige:la Dokpunké miksi di la dori ri:la kabnamdém kangge:la rébi pénampé idung. Dokpun-bí jarsu jarsula ludag-Ouwé ka:tok ngoluk lottado gulab appun kamang, sa: ouwa rétobo sa:, émna réla bomdakku.. "Okumlo gipingkunam lédulo rokom ayirdo birmé Unjer binyé lottalo kuyab tagburra gulab appun amingdém lébosudag. Unjer-bi la: Dokpun-bi gulab appun amingdém lebosula aipé mé podung, yampo ro: kolokké togor, ogog appun punkampé gulaldé sin pun-yé. Empila lo:disém rokom rokompé darobla asi piligdag. Empige:la bínyék méngkampé itomang Po:lo ako ima:pći gulab amingdé sipakkang. Dokpun-bi Po:lo lo:nyido: pak appun lekolo gila ka:toném gulab appun amingdé sanla sipagla dung. Mé bomsula réla bomkunam gulabdém sinamdém ka:la kabla gilendakku. Dokpun-ké kabla gilenkunamdém ka la anédé lo:maksula taddung, omé kapé íka:n? Anédok agomdém okkomsin lulatsuma:pé okum tungge:lo Dokpun-bí médirra tedla du:dag. Apiném doli:mang, iskul-pésin gimang. Dokpun kapil sémpé ipénampé idu ji édém ka la appun lekolo bari renga la ka tokuném aya: la lenam gulab amíngdé sipagla dung. Édém kayi:sula:ma:la kabla:dun Dokpun-bi. Édé ayirdo Dokpun-ké abudé parta:dokké borali ongo togabge:la bomtakku, édém ka begge la:sin Dokpun-bi me:pomang, po:pé borali ongo émmilo mé pola sumgo:dogai. Bík mé:dirdém kazla abudé taudag- Dokpun nom sé koi démtonei tunggé lo mé dírra du:je. Anědé abudém apping agomdém lubidag, gulab appun réla lenam do:yingém. Édém tadla abudé bíkké dungkodo gilenla, kéra do tedmínla naréngopé aya:la ludag, okkom mé:dirdang Dokpuna? Lékon bojsrso gasumko rébipé gulab appun amingém. Agom tatpa:sula Dokpun-bi mé:pola koyémola yírdag odokké lu:dag-Arroélang ba:bua. Agom tadbegla mé pola borali ongodog ké:nam apindem dokapé gia:dakku. Bí su:pak kolokké lo:dísém gulab appundo assém biyé turgabma: takamém. Gulab appundé turpa: yérung, Lékoném pun-yérung émna asin ara:bo pesula togabla bojarolokké rége:la gulab appundém leto Dokpun-bi.......?
